ສະຫະພັນແມ່ຍິງລາວ

ປິດຊຸດຝຶກອົບຮົມວິຊາຊີບໄລຍະ 3 ເດືອນ

ສູນຝຶກອົບຮົມແມ່ຍິງລາວໄດ້ຈັດພິທີມອບໃບຢັ້ງຢືນໃຫ້ແກ່ນັກຮຽນທີ່ຈົບຫລັກສູດການປຸງແຕ່ງອາຫານ-ການໂຮງແຮມ, ຕັດຫຍິບ
ແລະ ເສີມສວຍຄັ້ງວັນທີ 18/1/ ຫາ12/4/2013 ໃຫ້ກຽດມອບໃບຢັ້ງຢືນຄັ້ງນີ້ໂດຍ:  ທ່ານນ.ລາວັນ ສຸດທິສານ ຫົວຫນ້າສູນຝຶກ
ອົບຮົມແມ່ຍິງລາວ ສູນກາງສະຫະພັນແມ່ຍິງລາວ, ມີແຂກຖືກເຊີນ ແລະ ນັກຮຽນເຂົ້າຮ່ວມຢ່າງພ້ອມພຽງ. ຊຸດຝຶກອົບຮົມຄັ້ງນີ້ມີ
ນັກຮຽນໄດ້ຮັບໃບຢັ້ງຢືນທັງຫນົດ 37 ຄົນ, ຍິງ 34 ຄົນ, ຊາຍ 3 ຄົນ ໃນໄລຍະຂອງການຮຽນ ນັກຮຽນໄດ້ລົງມືປະຕິບັດຕົວຈິງ
ແລະ ໄດ້ລົງຝຶກງານຕາມໂຮງແຮມ,ຫ້າງຮ້ານຕ່າງໆນໍາອີກ, ຊຶ່ງໄດ້ຮັບການຕິດຕາມຈາກບັນດາຄູ-ອາຈານຢ່າງຕໍ່ເນື່ອງ ເພື່ອຮັບ
ປະກັນຄຸນນະພາບຂອງນັກຮຽນ.
ຜູ້ສໍາເລັດການຝຶກອົບຮົມວິຊາຊີບຄັ້ງນີ້ຈະໄດ້ນໍາເອົາຄວາມຮູ້ຄວາມສາມາດໄປປະກອບອາຊີບ ເພື່ອສ້າງລາຍຮັບໃຫ້ແກ່ຕົນເອງ ກໍ່ຄືຄອບຄົວ.

ເມືອງຈຳພອນປະກາດຮັບຮອງສະຫະພັນແມ່ຍິງ 3  ດີ

ກາງເດືອນເມສາ 2013 ສຍເມືອງ ຈໍາພອນ ໄດ້ຈັດພິທີປະກາດຮັບຮອງສະຫະພັນແມ່ຍິງເມືອງ 3 ດີ,ໃຫ້ກຽດເຂົ້າຮ່ວມ
ມີທ່ານນາງ ບຸນເຍື້ອນ ທິດພຸດທະວົງ ກໍາມະການພັກແຂວງ,ປະທານສຍ ແຂວງສະຫວັນນະເຂດ,ທ່ານ ລໍາເງິນ ທອງສີອັກສອນ
ກໍາມະການພັກແຂວງ ເລຂາພັກເມືອງ ເຈົ້າເມືອງໆຈໍາພອນ, ມີຄະນະສະຫະພັນແມ່ຍິງເມືອງ, ຕາງຫນ້າອົງການຈັດຕັ້ງມະຫາຊົນ

ອ້ອມຂ້າງ ແລະ ແຂກຖືກເຊີນຕະຫລອດຮອດພໍ່ແມ່ປະຊາຊົນເມືອງຈໍາພອນ ເຂົ້າຮ່ວມນໍາ.
ເມືອງຈໍາພອນ ມີສະມາຊິກສະຫະພັນແມ່ຍິງທັງຫມົດ 9,309 ຄົນມີ 102 ບ້ານ, ປະກອບດ້ວຍ 4 ເຜົ່າຄື:
ເຜົ່າລາວ, ເຜົ່າຜູ້ໄທ, ເຜົ່າມັງກອງ ແລະ ເຜົ່າກະຕາງ... 
ໃນໄລຍະ 3 ປີ ຜ່ານມາ(2010-2012)ຄະນະນໍາສະຫະພັນແມ່ຍິງແຕ່ລະຂັ້ນ ໄດ້ຈັດຕັ້ງເຜີຍແຜ່ເຊື່ອມຊຶມເອກະສານເນື້ອໃນ
ຂໍ້ແຂ່ງຂັນ 3 ດີ ໃຫ້ພະນັກງານ-ລັດຖະກອນ ແລະ ປະຊາຊົນຮັບຮູ້ເຂົ້າໃຈ ແລະ ນໍາໄປຈັດຕັ້ງປະຕິບັດຢ່າງເປັນຂະບວນຟົດຟື້ນ,
ກວ້າງຂວາງ ເຮັດໃຫ້ສະມາຊິກສະຫະພັນແມ່ຍິງ, ເອື້ອຍນ້ອງແມ່ຍິງ ແລະຄອບຄົວຈໍານວນຫລາຍໄດ້ສ້າງຕົນເອງໃຫ້ກາຍເປັນພົນ
ລະເມືອງດີ, ພັດທະນາດີ ແລະ ສ້າງຄອບຄົວດີມີຄວາມຜາສຸກ ຕາມເນື້ອໃນຂໍ້ແຂ່ງຂັນ 3 ດີ ວາງອອກໂດຍຕິດພັນກັບຂະ
ບວນການ 3 ສ້າງ ຂອງກົມການເມືອງສູນກາງພັກ ວ່າ ດ້ວຍການສ້າງແຂວງເປັນຫົວຫນ່ວຍຍຸດທະສາດ, ສ້າງເມືອງເປັນຫົວ
ຫນ່ວຍເຂັ້ມແຂງຮອບດ້ານ,ສ້າງບ້ານເປັນ ຫົວຫນ່ວຍພັດທະນາ.
ຜ່ານການຈັດຕັ້ງປະຕິບັດສາມາດສະຫລຸບຕີລາຄາແລະຮັບຮອງບ້ານສະຫະພັນແມ່ຍິງ 3 ດີ ໄດ້ 80 ບ້ານກວມເອົາ 78,43%
ຂອງຈໍານວນບ້ານທັງຫມົດ, ຮາກຖານສະຫະພັນແມ່ຍິງ 3 ດີ ໄດ້ 14 ຮາກຖານ ກວມເອົາ100% ຂອງຮາກຖານທັງຫມົດ,ຫນ່ວຍສະຫະພັນ
ແມ່ຍິງ 3 ດີ ໄດ້ 50 ຫນ່ວຍ ກວມເອົາ 83,33% ຂອງຈໍານວນຫນ່ວຍທີ່ຂືຶ້ນກັບເມືອງ, ເລືອກບຸກຄົນ 3 ດີ ປະເພດ 1 ໄດ້ 7,207 ຄົນ
ກວມເອົາ 92,63% ຂອງຈໍານວນຜູ້ເຂົ້າຮ່ວມແຂ່ງຂັນ, ບຸກຄົນ 3 ດີ ປະເພດ 2 ໄດ້ 505 ຄົນກວມເອົາ 6,06% ຂອງຈໍານວນຜູ້ເຂົ້າຮ່ວມແຂ່ງຂັນ ແລະມີຄອບຄົວຂອງສະມາຊິກສະຫະພັນແມ່ຍິງກາຍເປັນຄອບຄົວຕົວແບບ 24 ຄອບຄົວ ແລະ ຄອບຄົວດີມີຄວາມຜາສຸກ 7,207 ຄອບຄົວ. ຈາກຜົນງານທີ່ເອື້ອຍນ້ອງແມ່ຍິງຍາດມາໄດ້ນັ້ນ ຈຶ່ງເຮັດໃຫ້ເມືອງຈໍາພອນສາມາດຖືກຮັບຮອງ
ເປັນເມືອງສະຫະພັນແມ່ຍິງ 3 ດີ ແລະ ເປັນເມືອງທໍາອິດຂອງແຂວງ ສະຫວັນນະເຂດ.
ໂອກາດທີ່ມີຄວາມຫມາຍສໍາຄັນນີ້ ທ່ານປະທານສະຫະພັນແມ່ຍິງແຂວງ ໄດ້ມີຄໍາເຫັນ ແລະ ຮຽກຮ້ອງໃຫ້ຄະນະສະຫະພັນແມ່ຍິງ
ເມືອງ ຈົ່ງສືບຕໍ່ເສີມຂະຫຍາຍບົດຮຽນ ການຈັດຕັ້ງປະຕິບັດຂໍ້ແຂ່ງຂັນ 3 ດີ ຕິດພັນກັບວຽກງານ 3 ສ້າງ ຕາມພາລະບົດບາດ, ຫນ້າທີ່ ແລະ
ສິດຂອງສະຫະພັນແມ່ຍິງ ພ້ອມທັງນໍາເອົາບົດຮຽນການຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງເມືອງຈໍາພອນ ເປັນບ່ອນອີງໃຫ້ເມືອງອື່ນໆ ເພື່ອຍາດໃຫ້ໄດ້ເມືອງ 3 ດີ ໃນທົ່ວແຂວງ. ຄະນະພັກ, ອົງການປົກຄອງ ຈົ່ງສືບຕໍ່ຊີ້ນໍາ-ນໍາພາ ແລະ ເອື້ອອໍານວຍຄວາມສະດວກໃຫ້ຄະນະສະຫະພັນແມ່ຍິງ ໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ໃຫ້ໄດ້ຢ່າງກວ້າງຂວາງ, ຄະນະສະຫະພັນ
ແມ່ຍິງເມືອງຈົ່ງສືບຕໍ່ເອົາໃຈໃສ່ໃນການຕິດຕາມ,ກວດກາ, ຊຸກຍູ້ຂະບວນການແຂ່ງຂັນ 3 ດີຢູ່ຂັ້ນບ້ານ,ປະຕິບັດຫນ້າທີ່ເປັນເສນາທິການໃຫ້
ຄະນະພັກໃນການສຶກສາອົບຮົມ, ປຸກລະດົມຂະບວນການເຄື່ອນໄຫວຂອງແມ່ຍິງກໍ່ຄືຄອບຄົວ ປະກອບສ່ວນຢ່າງຕັ້ງຫນ້າເຂົ້າໃນພາລະກິດ
ປົກປັກຮັກສາ ແລະ ສ້າງສາພັດທະນາປະເທດຊາດ.

ໂດຍ: ສຍແຂວງ

3 ທາດແທ້ ແລະ 7 ມູນເຊື້ອ ຂອງກຳລັງປ້ອງກັນຄວາມສະຫງົບປະຊາຊົນລາວ

ເນື່ອງໃນໂອກາດວັນສ້າງຕັ້ງກໍາລັງປ້ອງກັນຄວາມສະຫງົບ ຄົບຮອບ 52 ປີ, ( 5 ເມສາ 1961-5 ເມສາ 2013) ທີ່ສູນກາງ
ສະຫະພັນແມ່ຍິງລາວ ໄດ້ຈັດພິທີຫວນຄືນມູນເຊື້ອຂອງກໍາລັງປ້ອງກັນຄວາມສະຫງົບປະຊາຊົນລາວ.
ໃນພິທີ ທ່ານນາງ ຄໍາຈັນ ພົມແສງສະຫວັນ ຮອງປະທານສູນກາງສະຫະພັນແມ່ຍິງລາວໄດ້ເລົ່າບາງຕອນຄວາມເປັນ
ມາ ແລະ ການເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບວ່າ: “ ນັບແຕ່ 1950ກອງປະຊຸມໃຫຍ່ແນວລາວ ຕໍ່ຕ້ານ
ທົ່ວປະເທດ ໄດ້ໄຂຂຶ້ນຢ່າງເປັນທາງການ, ກອງປະຊຸມໄດ້ຕົກລົງສ້າງຕັ້ງແນວລາວອິດສະຫລະ ແລະ ສ້າງຕັ້ງລັດຖະບານ
ລາວຕໍ່ຕ້ານຂຶ້ນ ຊຶ່ງປະກອບກົງຈັກການຈັດຕັ້ງຂຶ້ນ 5 ກະຊວງໃນນັ້ນມີກະຊວງພາຍໃນໂດຍມີ ທ່ານ ພູມີ ວົງວິຈິດ ເປັນລັດຖະມົນຕີ
ວ່າການ. ເພື່ອປົກປັກຮັກສາອົງການນໍາຂອງພັກ, ອໍານາດການປົກຄອງປະຕິວັດ 2 ແຂວງ ເຕົ້າໂຮມ(ແຂວງ ຫົວພັນ ແລະ ຜົ້ງສາລີ)ໄດ້
ຕົກລົງຈັດຕັ້ງ“ ກໍາລັງປ້ອງກັນ” ຂຶ້ນ  ໃນວັນທີ 10 ຕຸລາ 1954 ແລະ ໃນປີດຽວນີ້ເອງທ່ານປະທານ ໄກສອນ ພົມວິຫານ ໄດ້ປະ
ກາດສ້າງຕັ້ງ “ ຄະນະສັນຕິລາດສູນກາງ ” ຊຶ່ງເຮັດຫນ້າທີ່ຕົ້ນຕໍປ້ອງກັນຄະນະກໍາມະການກວດກາສາກົນ;ປົກປັກຮັກສາອົງການນໍາພັກ-
ລັດ; ປຸກລະດົມຂົນຂວາຍແລະ ກໍ່ສ້າງຮາກຖານຢູ່ໃນຕົວເມືອງ. 1957 ເພື່ອກຽມໃຫ້ແກ່ການປ້ອງກັນຜູ້ນໍາທີ່ເຂົ້າຮວມລາວຄັ້ງທີ I
ສູນກາງພັກ ໄດ້ຕົກລົງປ່ຽນຊື່ຈາກ “ ຄະນະສັນຕິລາດ ສູນກາງ” ມາເປັນ “ ຄະນະປ້ອງກັນພາຍໃນ” ເພື່ອເຮັດຫນ້າທີ່ປ້ອງກັນລັດ
ຖະບານປະສົມຄັ້ງທີ I. ຄະນະຊີ້ນໍາສູນກາງພັກປະຊາຊົນລາວ ໄດ້ເປີດກອງປະຊຸມຄົບຄະນະຂຶ້ນທີ່ຄັງໄຂແຂວງ ຊຽງຂວາງ ໃນຕົ້ນເດືອນ ເມສາ 1961 ກອງປະຊຸມໄດ້ຕົກລົງປ່ຽນຊື່ “ ຄະນະປ້ອງກັນພາຍໃນ” ມາເປັນ “ ຫ້ອງການປ້ອງກັນຄວາມສະຫງົບ.”
ວັນທີ 1 ກັນຍາ 2005 ລັດຖະບານໄດ້ຕົກລົງ ແລະ ອອກດໍາລັດເລກທີ 277 / ນຍ ຮັບຮອງເອົາ ວັນທີ 5 ເມສາ 1961
ເປັນມື້ສ້າງຕັ້ງກໍາລັງປ້ອງກັນຄວາມສະຫງົບ ຢ່າງເປັນທາງການ.
ນັບແຕ່ມື້ສ້າງຕັ້ງ  ແລະ  ການເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບປະຊາຊົນລາວ ສາມາດສັງລວມໄດ້ 3
ທາດແທ້ ແລະ 7 ມູນເຊື້ອຂອງກໍາລັງປ້ອງກັນຄວາມສະຫງົບຄື:

ï ດ້ານທາດແທ້:
1. ແມ່ນກໍາລັງປະກອບອາວຸດປະຕິວັດຂອງພັກໂດຍແມ່ນພັກປະຊາຊົນປະຕິວັດລາວເປັນຜູ້ສ້າງຕັ້ງ, ນໍາພາເດັດຂາດໂດຍກົງແລະ
ຮອບດ້ານ.
2. ເປັນກໍາລັງມາຈາກປະຊາຊົນ, ໂດຍປະຊາຊົນແລະ ເພື່ອປະຊາຊົນ; ຍາມໃດກໍຮັບໃຊ້ປະຊາຊົນຢ່າງບໍ່ມີຂອບເຂດແລະ
ເງື່ອນໄຂ.
3. ແມ່ນກໍາລັງປະກອບອາວຸດປະຕິວັດທີ່ມີລະບຽບວິໄນເຂັ້ມງວດ, ບໍ່ວ່າເວລາໃດ ແລະ ໃນສະຖານະການໃດກໍເດັດດ່ຽວ,
ເດັດຂາດຕໍ່ສັດຕູ.
ï ດ້ານມູນເຊື້ອ:
1. ມີຄວາມຈົງຮັກພັກດີຕໍ່ປະຊາຊົນ,ປະເທດຊາດ, ຕໍ່ອຸດົມການສັງຄົມນິຍົມ, ມີຄວາມອົດທົນ, ມີນຳ້ໃຈເສຍສະຫລະສູງສົ່ງ.
2. ຫັນລົງຮາກຖານປຸກລະດົມຂົນຂວາຍ, ກໍ່ສ້າງຮາກຖານການເມືອງໃກ້ຊິດຕິດແທດກັບປະຊາຊົນ, ຮ່ວມສຸກ, ຮ່ວມທຸກກັບປະຊາຊົນ.
3. ມີມູນເຊື້ອພິລາອາດຫານ ແລະ ຕໍ່ສູ້ບໍ່ຍອມຈໍານົນກັບສັດຕູ ແລະ ກຸ່ມຄົນບໍ່ດີສາມາດປົກປັກຮັກສາສະຖຽນລະພາບທາງ
ດ້ານການເມືອງ, ຄວາມສະຫງົບປອດໄພ, ຄວາມເປັນລະບຽບຮຽບຮ້ອຍຂອງສັງຄົມ.
4. ມີມູນເຊື້ອດຸຫນັ່ນຂະຫຍັນພຽນໃນການອອກແຮງງານ, ເພີ່ມພູນຜະລິດຜົນ, ປະຢັດມັດທະຍັດ, ເພິ່ງຕົນເອງກຸ້ມຕົນເອງ ແລະ
ສ້າງຄວາມເຂັ້ມແຂງດ້ວຍຕົນເອງ.
5. ມີມູນເຊື້ອສາມັກຄີເປັນເອກະພາບພາຍໃນແລະ ສາມັກຄີກັບປະຊາຊົນລາວ ບັນດາເຜົ່າຢ່າງແຫນ້ນແຟ້ນ
6. ມີລະບຽບວິໄນ, ມີສະຕິຕໍ່ການຈັດຕັ້ງ ແລະປະຕິບັດຄໍາສັ່ງຢ່າງເຂັ້ມງວດ, ກຽມພ້ອມສູ້ຮົບ.
7. ມີມູນເຊື້ອພົວພັນຮ່ວມມືກັບປະເທດຍຸດທະສາດ ແລະ ສາກົນ.
ເພື່ອເສີມຂະຫຍາຍມູນເຊື້ອ ແລະ ທາດແທ້ ອັນດີງາມດັ່ງກ່າວ ໃຫ້ຍືນຍົງຕະຫລອດໄປ, ພະນັກງານ, ຕໍາຫລວດ,
ເຈົ້າຫນ້າທີ່ຮັກສາຄວາມສະຫງົບ ຈົ່ງສືບຕໍ່ຈັດຕັ້ງປະຕິບັດແນວທາງປ້ອງກັນຊາດປ້ອງກັນຄວາມສະຫງົບທົ່ວປວງຊົນຕິດພັນກັບ

ການພັດທະນາເສດຖະກິດ-ວັດທະນະທໍາ-ສັງຄົມ ໂດຍສະເພາະການຈັດຕັ້ງປະຕິບັດມະຕິ 103 ຂອງກົມການເມືອງສູນກາງພັກ
ວ່າດ້ວຍການເພີ່ມທະວີວຽກງານປ້ອງກັນຄວາມສະຫງົບໃນສະພາບການໃຫມ່ໃຫ້ມີປະສິດທິຜົນສູງ. ສຶກສາອົບຮົມ,ປຸກລະດົມທົ່ວປວງຊົນ ພ້ອມກັນ
ເປັນເຈົ້າການເຮັດວຽກປ້ອງກັນຊາດປ້ອງກັນຄວາມສະຫງົບຮັບປະກັນໃຫ້ປະ ເທດຊາດມີຄວາມສະຫງົບ, ຫມັ້ນຄົງແລະເປັນລະບຽບຮຽບຮ້ອຍ
ຢ່າງຫນັກແຫນ້ນ.
- ຕັ້ງຫນ້າປັບປຸງ, ກໍ່ສ້າງກໍາລັງປ້ອງກັນຄວາມສະຫງົບຢ່າງຮອບດ້ານໂດຍຖືເອົາ ການປັບປຸງກໍ່ສ້າງກໍາລັງທາງດ້ານຄຸນທາດ
ການເມືອງເປັນກົກ, ຖືເອົາການກໍ່ສ້າງກໍາລັງ ທາງດ້ານຄວາມຮູ້, ຄວາມສາມາດດ້ານວິຊາການ, ວິຊາສະເພາະເປັນສໍາຄັນ, ການປັບປຸງ
ກໍ່ສ້າງພະນັກງານນໍາພາ, ບັນຊາເປັນອັນຕັດສິນ.

- ສືບຕໍ່ຫັນລົງກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຄາດຫມາຍ
- ສະກັດກັ້ນບັນດາຫນໍ່ແຫນງກໍ່ຄວາມບໍ່ສະຫງົບໃຫ້ໄດ້ຢ່າງເດັດຂາດ ແລະ ເອົາໃຈໃສ່ແກ້ໄຂບັນດາປະກົດການຫຍໍ້ທໍ້ຢູ່ໃນສັງຄົມ.
- ສືບຕໍ່ປະຕິບັດແນວທາງການຕ່າງປະເທດຂອງພັກເຮົາ,ເຂົ້າຮ່ວມພົວພັນນໍາຕໍາຫລວດສາກົນແລະບັນດາປະເທດເພື່ອນມິດຍຸດ
ທະສາດບົນພື້ນຖານຕ່າງຝ່າຍຕ່າງມີຜົນປະໂຫຍດ .
ນອກຈາກນີ້ທ່ານຍັງໄດ້ຍົກໃຫ້ເຫັນການປະກອບສ່ວນຂອງສະຫະພັນແມ່ຍິງລາວຕໍ່ວຽກງານປ້ອງກັນຄວາມສະຫງົບໃນໄລຍະຜ່ານມາ
ແລະ ສືບຕໍ່ເສີມຂະຫຍາຍການເຂົ້າຮ່ວມຕໍ່ວຽກງານດັ່ງກ່າວຢ່າງແຂງແຮງ ໂດຍສະເພາະເປັນເຈົ້າການ, ເປັນຫູເປັນຕາໃຫ້ການຈັດຕັ້ງ, ເປັນເຈົ້າ
ການຍົກສູງສະຕິລະວັງຕົວຕໍ່ກົນອຸບາຍຫັນປ່ຽນຂອງສັດຕູຮອບດ້ານ.

ໂດຍ: ອ ອິນທະສານ

ດາວເຮືອງພາໃຫ້ຮຸ່ງເຮືອງແທ້


ຫລາຍຄົນຄົງບໍ່ເຊື່ອວ່າປູກດອກດາວເຮືອງຂາຍຈະສາມາດສ້າງລາຍໄດ້ເປັນສິບໆ ລ້ານກີບ ຈົນສາມາດມີເຮືອນຢູ່ ມີລົດຂີ່ ຄອບ
ຄົວມີຄວາມຢູ່ດີກິນດີ ທີ່ສຳຄັນຄອບຄົວສາມາດຫລຸດພົ້ນຈາກຄວາມທຸກຍາກໄດ້ຖາວອນ. ນັ້ນກໍຄືຄອບຄົວຂອງ ນາງຍີ່ ປະຊາຊົນບ້ານຕາດ
ທອງ ເມືອງສີໂຄດຕະບອງ ນະຄອນຫລວງວຽງຈັນ ທີ່ຖືເອົາການປູກດອກດາວເຮືອງ ເປັນອາຊີບ ລ້ຽງຄອບຄົວມາເປັນສີບກວ່າປີແລ້ວ
ແລະ ຍັງຈະຢຶດອາຊີບນີ້ຕໍ່ໄປ.
ຄອບຄົວນາງ ຍີ່ ປະຊາຊົນບ້ານຕາດທອງ ເມືອງສີໂຄດຕະບອງ, ນະຄອນຫລວງວຽງຈັນ ເປັນ 1 ໃນ 5 ຄອບຄົວ ທີ່ເຄີຍຖືກລະ
ບຸວ່າເປັນຄອບຄົວທຸກຍາກທີ່ສຸດ ຂອງບ້ານຕາດທອງ ຍ້ອນບໍ່ມີທີ່ດິນ ແລະ ບໍ່ມີເຮືອນຢູ່ເປັນຂອງຕົນເອງ ສະພາບການດຳລົງ ຊີວິດ
ຂອງຄອບຄົວແມ່ນຫາເຊົ້າກິນຄ່ຳດ້ວຍການຫາຫນໍ່ໄມ້ຂາຍເພື່ອລ້ຽງຊີບແຕ່ບໍ່ກຸ້ມກິນ, ລູກ 4 ຄົນ ກໍກຳລັງຢູ່ໃນໄວຮຽນ ແຕ່ຄອບຄົວກໍບໍ່
ມີຄວາມສາມາດພໍທີ່ຈະສົ່ງລູກໃຫ້ຮຽນສູງໄດ້. ເພື່ອໃຫ້ລູກທຸກຄົນໄດ້ຮຽນຫນັງສືສູງ, ມີອະນາຄົດທີ່ດີຄືກັບຄອບຄົວອື່ນ ແລະ ຄອບຄົວ
ມີຢູ່ມີກິນມີລາຍໄດ້ພຽງພໍສຳລັບໃຊ້ຈ່າຍຄອບຄົວ. ຄອບຄົວທ່ານນາງຍີ່ ຈຶ່ງໄດ້ພະຍາຍາມຊອກ ຫາຫົນທາງທຳມາຫາກິນທີ່ຄິດວ່າເຫມາະ
ກັບຄວາມອາດສາມາດກັບຄອບຄົວໃນການສ້າງລາຍໄດ້ລ້ຽງລູກໆ ແລະ ສຸດທ້າຍພົບທາງອອກຄືປູກດອກດາວເຮືອງຂາຍ. ລາຍໄດ້ຈາກ
ການຂາຍດອກດາວເຮືອງສາມາດພາໃຫ້ທຸກຄົນໃນຄອບຄົວມີຢູ່ມີກິນ ມີຊີວິດການເປັນຢູ່ທີ່ດີຂຶ້ນຈາກ ແຕ່ກ່ອນຢ່າງບໍ່ຫນ້າເຊື່ອ ແລະ ຄອບຄົວໄດ້ຖືເອົາການປູກດອກໄມ້ເປັນອາຊີບມາຈົນຮອດ ທຸກມື້ນີ້.
ນາງຍີ່ ໄດ້ເລົ່າໃຫ້ຟັງວ່າ ແຕ່ກ່ອນຄອບຄົວແມ່ນທຸກຍາກອີ່ຫລີ ຫາເຊົ້າກິນຄໍ່າ ເພາະບໍ່ມີອາຊີບທີ່ແນ່ນອນສ່ວນຫລາຍແມ່ນ
ຫາຫນໍ່ໄມ້ຂາຍ ມື້ຫາໄດ້ຫລາຍກໍໍໄດ້ກິນອີ່ມ ມື້ຫາ ບໍ່ໄດ້ກໍຕ້ອງອົດ. ແຕ່ດ້ວຍຄວາມເປັນຫ່ວງຂອງອົງການປົກຄອງບ້ານເພື່ອເຮັດແນວ
ໃດໃຫ້ສະມາຊິກທຸກຄອບຄົວໃນບ້ານຂອງຕົນມີຄວາມອຸດົມສົມບູນມີຢູ່ມີກິນ ແລະ ພ້ອມກັນຫລຸດ ພົ້ນອອກຈາກຄວາມທຸກຍາກນັ້ນ
ທາງຄະນະບ້ານກໍໄດ້ລະດົມໃຫ້ຄອບຄົວເຂົ້າເປັນສະມາຊິກ ກອງທຶນຝາກເງິນປະຢັດ ແລະ ຢືມເງິນໄປເຮັດການຜະລິດ ບວກກັບເວລານັ້ນ
ຕົນເອງໄດ້ໄປເລາະຊື້ເຄື່ອງທີ່ຕະຫລາດ ແລະ ເຫັນຄົນຂາຍຫມາກເບັງຈຶ່ງຄິດວ່າຖ້າປູກດອກດາວເຮືອງ ຂາຍກໍຄົງຈະດີເພາະສັງຄົມລາວ
ເປັນສັງຄົມຊາວພຸດ ຕ້ອງໃຊ້ດອກໄມ້ໃນການບູຊາ ແລະ ໃຊ້ສຳຫລັບປະກອບພິທີກຳຕ່າງໆ, ຈຶ່ງໄດ້ນຳຄວາມຄິດດັ່ງກ່າວມາປຶກສາກັບຜົວ
ແລະ ລູກ ເມື່ອທຸກຄົນໃນຄອບຄົວເຫັນດີ ກໍໄດ້ຕັດສິນໃຈຢືມເງິນກອງທຶນບ້ານ ຈຳນວນ 5.000.000 ກີບ ມາລົງທຶນເຊົ່າດິນ, ຄ່າໄຖ
ແລະ ຄາດດິນເພື່ອປູກດອກດາວເຮືອງ ແລະ ສ່ວນຫນຶ່ງກໍເກັບໄວ້ໃຊ້ຈ່າຍສິ່ງທີ່ຈຳເປັນສຳລັບການປູກ ແລະ ໃຊ້ໃນຄອບຄົວໃນລະຫວ່າງ
ລໍຖ້າເກັບດອກໄມ້ຂາຍ.ເບື້ອງຕົ້ນປູກພຽງເຄິ່ງໄລ່ ໃຊ້ເວລາ 3 ເດືອນກໍໄດ້ເກັບຂາຍໄດ້ເທ່ືອລະຮ້ອຍກິໂລ ຂາຍໃນລາຄາກິໂລລະ
5.000-6,000 ກີບ ປູກເທື່ອຫນຶ່ງສາມາດເກັບໄດ້ເຖິງ 4 ເດືອນ ແລະ ເມື່ອເຫັນວ່າມີລາຍໄດ້ດີ ຈຶ່ງໄດ້ເຊົ່າເນື້້ອທີ່ປູກອອກອີກເປັນ 5 ໄລ່
ຄ່າເຊົ່າປີລະ 600.000 ກີບî. ນາງຍີ ໃຫ້ຮູ້ຕື່ມວ່າດອກໄມ້ທີ່ປູກນີ້ບໍ່ໄດ້ສົ່ງຂາຍສະເພາະແຕ່ໃນວຽງຈັນເທົ່ານັ້ນ ແຕ່ຍັງສົ່ງໄປຂາຍໃນຕ່າງ
ແຂວງນຳອີກ ແລະ ຄວາມຕ້ອງການຂອງຕະຫລາດຍັງ ມີຫລາຍ, ຖ້າທ່ານໄດ້ສົນໃຈຢາກປູກກໍສາມາດປູກໄດ້ ເພາະດອກດາວເຮືອງ
ປູກງ່າຍ, ໃຊ້ຕົ້ນທຶນຕໍ່່າ ແລະ ໃຊ້ແຮງງານຫນ້ອຍ.
ປະຈຸບັນຄອບຄົວນາງ ຍີ່ ມີລາຍຮັບຈາກຂາຍດອກໄມ້ປີລະຫລາຍກວ່າ 50,000,000 ກີບ, ຄອບຄົວມີຊີວິດການເປັນຢູ່ທີ່ດີ. ມີດິນ ແລະ ເຮືອນຢູ່ເປັນຂອງຕົນເອງ ມີພາຫານະ, ມີເຄືື່ອງໃຊ້ຕ່າງໆ ທີ່ອຳນວຍຄວາມສະດວກໃຫ້ແກ່ຄອບຄົວ,ລູກໆໄດ້ຮຽນຫນັງ
ສື. ທີ່ສຳຄັນມີ ເງິນທ້ອນກ້ອນໃຫຍ່ໄວ້ເປັນທຶນການສຶກສາຂອງລູກ ແລະ ໃຊ້ຈ່າຍຕ່າງໆ ໃນຍາມຈຳເປັນ. ຜ່ານການປູກດອກດາວເຮືອງ
ຂາຍເປັນເວລາ 10 ປີ ຄອບຄົວຂອງທ່ານນາງ ຍີ່ ສາມາດຫລຸດພົ້ນອອກຈາກຄວາມທຸກຍາກຢ່າງຖາວອນ.
ຄອບຄົວຈະມີຢູ່ມີກິນ ແລະ ຫລຸດພົ້ນຈາກຄວາມທຸກຍາກຄອບຄົວທຸກຍາກແຕ່ລະຄອບຄົວຕ່າງກໍມີວິທີການຂອງໃຜລາວ
ໃນການທຳມາຫາກິນ ຂຶ້ນຢູ່ກັບທ່າແຮງຄວາມສາມາດ, ຄວາມອົດທົນ ແລະ ທີ່ສຳຄັນທຸກຄົນໃນຄອບຄົວຕ້ອງພ້ອມພຽງ ກັນໃນການທຳ
ມາຫາກິນ ທັງເປັນການປະກອບສ່ວນພັດທະນາປະເທດໃຫ້ຫລຸດພົ້ນອອກຈາກ ຄວາມດ້ອຍພັດທະນາ.
ໂດຍ: ມະນີວອນ